如何理解「立即變差」嘅美國GDP數字？
入口同庫存嘅影響
【如果你收到篇文嘅電郵，係因為你曾經係Econ記者網站訂閱過所謂嘅newsletter，依家我會將有關嘅newsletter轉到substack 平台發佈，希望可以持續定期分享文章。新朋友亦可在此訂閱。】
美國第一季GDP出乎意料錄得1.4%（經年化季度）下跌，遠低於第四季嘅6.9%增長。其實Bureau of Economic Analysis嘅報告都簡單解釋左有兩個因素令數據下跌，一為貿易逆差擴大，二為庫存減少嘅拖累。
貿易逆差對第一季數字帶來3.2個百分點嘅下跌，因為入口按季增長高達17.7%，而出口就跌5.9%。
要記得，GDP數字係統計緊一國之內嘅生產價值，而入口就係本國居民將啲錢洗左係其他國家嘅生產，所以需要將呢啲計左係費數據嘅價值抽返出黎，所以就會「拖累」GDP數字。
庫存問題就更有趣。庫存嘅概念就係一啲生產左但未賣出嘅產品，因為GDP計算嘅係一個年度內一國產出嘅價值，無人買個「製造」左嘅價值就以「投資」嘅概念入帳。
第一季出現嘅情況，就係錄得345億美元嘅庫存減少，對GDP帶來84點子嘅拖累。要解釋呢個下跌，一個方向係去年第四季庫存大幅增加25990億美元。有分析認為商家為因為怕供應鏈問題，與及為應付年尾節日而大幅庫存，所以到第一季就開始清減庫存。不過目前庫存總值仍然達15870億美元，可能清庫存壓力仍會持續？
值得留意，報告係特別提到汽車係減庫存嘅主要產品之一：
The decrease in private inventory investment was led by decreases in wholesale trade (mainly motor vehicles) and retail trade (notably, "other" retailers and motor vehicle dealers).
而其實係二月同三月嘅Personal Income報告都有講過汽車嘅消費減少：
二月： Within goods, spending on motor vehicles and parts was the leading contributor to the decrease.
三月： Within goods, an increase in nondurable goods (led by gasoline and other energy goods) was partly offset by a decrease in spending on durable goods (led by motor vehicles and parts).
睇黎油價上升嘅效應正減低美國人對汽車嘅需求，改變疫情期間嘅搶買嘅情況，所以唔再特別去補充存貨？ 而呢啲行為開始對數據有微微嘅負面在影響？
理解完呢兩點，係咪就等如個GDP數據唔太差？ 的確，個人消費開支嘅增長有2.7%，特別係服務嘅消費增長4.3%，而商業投資增長更達9.2%，可以講本土嘅需求仍然強勁。入口急增其實亦都係反映呢個情況，只係買嘅唔係本土生產。
問題就係，聯儲局目前就係急於要加息就係要急速為本地需求降温，呢份GDP報告雖然未必係該局嘅重要考量，但佢反映嘅經濟情況相信唔會令聯儲局改變其「要快啲加到去自然利率」嘅決定。
愈來愈快嘅加息步伐，似乎唔會因為呢個「意外轉差」嘅GDP數據而變改。